Осветување на црквата посветена на „Свето Преполовение“ во с. Ложани – Струшко (25.04.2010)
На 26/12 април 2010 година (недела) на четврта недела по Велигден посветена на Раслабениот, Владиката Дебарско-кичевски г. Тимотеј заедно со свештенослужители од Струшкото и Охридското архиерејско намесништво, изврши осветување на црквата посветена на „Свето Преполовение“ во с. Ложани - Струшко.
Црквата е посветена на црковниот празник со кој се одбележува средината помеѓу Велигден и Педесетница и се именува ПРЕПОЛОВЕНИЕ НА ПЕДЕСЕТНИЦА, а централната Личност Којашто се празнува на овој празник е нашиот Спасител Господ Исус Христос.
Оваа малечка црква се изгради за рекордно време, благодарение на посветеноста на Црковниот одбор од селото Ложани, како и на младиот парохиски свештеник отец Ристе Наумоски. Но поголем финансиски удел во изградбата дадоа доброволните даренија на верниците од парохијата.
Свеченоста беше збогатена и со културно-уметничка програма организирана од младите во селото, додека за сите присутни верници Црковниот одбор подготви свечена трпеза, која беше поставена во близината на новоосветената црква.
Иако црквичката е со малечки димензии сепак парохискиот свештеник ќе може на празникот на кој што е посветена да отслужи Божествена Литургија и да ги повикува верниците од парохијата кон следење и исполнување на евангелиските заповеди.
Нека е за многу години.
Известува: Свештеник Игор Никовски
МПЦ Дебарско-кичевска епархија
